Prime Minista Charlot Salwai, hemi stap long aelan blong hem blong Pentecost tede blong vot long Penama provincial election. Mr Salwai mo Misis Salwai tufala i kasem Pentecost long yestede blong vot long tede long poling stesen blong Melsisi long sentrol Pentecost.

Melsisi hemi wan long olgeta bigfala poling stesen blong Pentecost wetem ova long 500 pipol we oli regista blong vot. Mr Salwai mo Misis Salwai istap vot oltaem long general mo provincial election.

Ripot long Melsisi tede moning i talem se pipol istat blong laen blong vot stat long moning finis. Mr Salwai bae hemi kasem Port Vila long wiken.

Ikat ol nara minista mo ol palamentri sekretri we oli stap tu long aelan blong olgeta blong vot long tede. Ol provins we oli go long election long tede, ikat Penama, Malampa, Shefa mo Tafea.

Designed by PG IT Consulting - webdesign.vu