Wan hae level delegesen blong indipenden muvmen blong FLNKS blong Kanaky istap naoia long Port Vila blong kolektem ol tok tok long ol lida blong Vanuatu olsem wanem mo hao Vanuatu i kasem indipendens blong hem long 30 Julae 1980. Bifo oli statem wok long tusde moning, oli bin mekem wan visit ikam long Praem Minista Charlot Salwai blong talemaut ting ting bihaen long visit blong olgeta. Mr Salwai i talem tankiu long ol lida blong FLNKS long ol wok we oli mekem long graon blong priperem ol kanak afta end blong Noumea Accord. Praem Minista Salwai i talem se long saed blong Vanuatu, sapot blong gavman mo pipol blong hem long stragol blong ol kanak, hemi stap semak nomo. Hemi talem se sapot blong Vanuatu, hemi stap semak nomo. Mr Salwai i talem se bae Vanuatu i gohet blong tokbaut isiu blong ol kanak long ol rejinol mo international level. Hemi talem se isiu blong indipendens blong ol kanak hemi absent long Melanesian oganaesen blong Melanesian Spearhead Group, MSG. Mr Salwai i talem se hemia, hemi long level blong ol lida nomo be sapot blong indipendens blong ol kanak, hemi stap semak nomo long ol pipol blong Melanesia. Afta long sot miting wetem PM Salwai, delegesen igo holem miting wetem Deputi Praem Minista, Joe Natuman, foma praem minista, Barak Sope, foma presiden blong Ripablik blong Vanuatu mo naoia Ombudsman Kalkot Mataskelekele mo foma minista blong internal afea, Pastor John Sethy Regenvanu. Ol lida ia, oli bin bin kontribiut blong raitem National Constitution blong Vanuatu mo mekem wok blong Vanuatu i kasem indipendens blong hem long 1980. Oli storian abaut wanem oli kolem transition period, gavman blong National Unity, indipendens blong 1980 mo afta indipendens. Ol lida blong FLNKS, oli askem plande kuesten spesiali long transition period, gavman blong national uniti, mani blong Vanuatu mo hao nao Vanuatu i gohet blong holem taet strong kastom mo respek long ol chief blong hem. Oli askem kuesten tu abaut system blong kot blong Vanuatu. Ol olfala lida blong Vanuatu i eksplenem long olgeta se hemi no bin isi blong Vanuatu i kasem indipendens blong hem be wan samting we i mekem se hemi hapen, hemi from we pipol i wandem indipendens. Ol lida blong Vanuatu ia, oli eksplenem long olgeta se tok tok we i talem se "yumi no redi" hemi no tru tok tok from we man Vanuatu mo ol kanak, oli bin laef long ples blong olgeta bifo Franis mo England, tufala ikam. Oli talem se hemi bin hat from we ikat plande aelan we oli komposem Vanuatu komperem long Kanaky. Delegesen ia, hemi mitim ol chief, Constitution Reviu Committee mo ol nara bodi blong Vanuatu olsem polis.

Designed by PG IT Consulting - webdesign.vu