Long yestede, 26 April 2017, gavman tru long ministri blong agrikaltsa, hemi soem long olgeta pipol blong Tanna olsem wan blong planem onion mo karot. Demonstresen blong planem onion ia, hemi pat blong wan wik kampein blong planem poteto long aelan blong Tanna. Blong karemaut kampein ia minista blong agrikaltsa, Matai Seremaiah, hemi go daon wetem ful dipatmen we oli stap anda long hem mo dipatmen blong treid mo kopritiv.

Akting DG blong treid, Georges Borugu i talem se main ting ting bihaen blong enkarejem pipol blong Tanna blong plandem ol krop ia, hemi blong mekem se oli nomo dipen long ol krop ia we oli kam long nara kantri. Hemi talem se aelan blong Tanna, hemi wan aelan we ikat plande turis, oli stap visitim long wan yia. Mr Borugu talem se oli fainemaut se ol smol bisnis blong Tanna we oli dil wetem ol turis, oli stap pem mit, poteto, karot mo ol nara krop bagegen long Port Vila blong fitim ol turis long hem. Hemi talem se iven eg blong faol, oli mas karem long Port Vila. Hemi talem se hemi hapi bigwan long ting ting ia blong mekem se taem we ol turis, oli fuldaon long Tanna, oli kakae ol kakae we oli groem nomo long Tanna. Mr Borugu i talem se aelan blong Tanna, graon blong hem, hemi gud long ol krop we Vanuatu istap impoten long Australia o long New Zealand.

Designed by PG IT Consulting - webdesign.vu