Praem Minista Charlot Salwai i talemaut long airport yestede afternun afta we hemi kasem bak kantri afta long wan wik visit blong hem long China se ol riaksen mo ol tok tok blong pipol blong Vanuatu abaut media laef coverage blong anda 20 futbol tim long Korea, oli positive.

Mr Salwai i talem se Vanuatu i should praod long perfomens we ol yang boe, oli mekem long fes match blong olgeta agensem Mexico. Hemi talem se blong ol boe Vanuatu, oli skorem 2 poen agensem Mexico we hemi winim wol kap finis, hemi wan histri blong Vanuatu.

Mr Salwai i talem se Vanuatu ino stap long wan level olsem Mexico long saed blong Futbol be ol boe, oli pruvum olgeta mo difendem kala blong Vanuatu long foret blong wol. Hemi talem se hemi bin stap long Port Vila Municipal Stadium mo watchem match blong ol yangfala ia bifo oli go long Korea mo hemi hapi long perfomens blong olgeta. Ofis blong Praem Minista i asurem ol pipol blong Vanuatu se stat tede bae pipol i save watchem laef match blong Vanuatu long 7 klok lokol taem long Television blong Vanuatu. Laef coverage, bae hemi kamaut tru long hat wok blong gavman tru long OGCIO mo VBTC.

Ofis blong praem minista i talem se gavman bae hemi aloketem neseri vatu blong kavremap kosting blong coverage ia long ol otoriti blong futbol olsem FIFA. Long yestede moning akting praem minista, Ham Lini mo minista blong pablik utiliti, Jotham Napat, tufala i bin holem miting wetem managment blong OGCIO mo VBTC blong mekem sua se seken match blong Vanuatu long tede naet, hemi mas kamaut laef long TBV.

Leit long yestede naet long 7 klok, Mr Lini mo Mr Napat, tufala i bin witnesem fes laef coverage we OGCIO i mekem long bigfala skrin long Saralana steij wetem match blong Franis mo Honduras.

Chief Excecutive Officer blong OGCIO, Gerard Metsan i talem se last naet finis ol pipol blong Sola long Torba, Ambae mo ol nara aelan we ikat gavman netwok long hem, oli folem match blong Franis mo Honduras.

Mr Metsan i talem se hemia i wan nara step foward tu blong coverage blong match ia blong save watchem laef long TBV, netwok blong gavman mo tru long website blong gavman long adress ia: gov.vu. Hemia i minim se sapos u no kasem TBV o gavman netwok be yu kat akses long internet, yu save folem match tede naet long gavman website. Long Port Vila, pablik i welkam long bigfala skrin long Saralana steij.

Designed by PG IT Consulting - webdesign.vu