Vanuatu hemi wan long olgeta kantri we oli memba  blong Forum blong hemi save sendem ol memba blong Vanuatu Police Force blong hem blong oli save go serv anda long Regional Assistance Mission to Solomons Islands we oli kolem long sot nem blong hem RAMSI

RAMSI hemi statem wok blong hem long 2003 be bifo RAMSI, Vanuatu, hemi bin sendem festaem finis ol memba blong Vanuatu Polis Force blong go provaidem lo mooda long ol pipol blong Solomon Islands folem wanem oli kolem ethnic tension we hemi bin stap bitwin ol pipol blong Guadacanal we taon blong Honiara istap long hem mo olgeta pipol blong nara aelan blong Solomon aelan, Malaita.

Strong komitmen blong Vanuatu blong mekem se lo moodai save kambak long ol Melanesian brata blong hem, hemi mekem  Praem Minista blong Solomon Islands, Manasseh Sogavare, hemi presentem medol plak igo long Deputi Praem Minista, Joe Natuman, long foret plande handred tausen pipol we oli bin stap long Lonsantana Stedium long Tasde 29 June 2017. Ol nara kantri we oli memba blong Forum tu oli bin kasem medol eksept Franis Polinesia mo New Caledonia we tufala i teskam memba blong Forum long 2016. Stat long 2003 kasem end blong RAMSI, Vanuatu, hemi bin sendem ova long 180 memba blong fos blong hem igo long Solomons. Vanuatu, hemi wan long forum memba kantri tu we hemi bin lusum wan memba blong fos blong hem long taem we hemi stap serv long Solomon Islands.  Mr Natuman, hemi bin kasem medal ia long taem blong ofisiol seremoni we hemi bin tekem ples long Losantana Stedium. Long seremoni ia, hemi bin lukim plande pipol oli bin stap long taem stat long ol pikinini igo kasem ol olfala blong talem tata blong RAMSI. Hemi bin wan seremoni we hemi tatsem hat blong ol pipol blong Solomon Islands from we iven ol pipol we oli stap long wiltsea, oli bin mekem way blong olgeta blong kam kasem long stadium. Long taem ia ples blong sidaon, hemi bin fas gud mo antap long hil narasaed long stedium, hemi bin fulap.  Pipol I klaem long ol tri mo hil autsaed long stedium blong lukim seremoni blong talem tata blong RAMSI.  Praem Minista Sogavare mo mea blong Honiara, tufala itekem taem ia  blong talem se naoia we  RAMSI istap lego olgeta fiutsa blong  Solomon Islands  istap long hand blong sitisen blong kantri ia. Long naet long taem ia, ova long 500 yang pipol, oli bin tekem abaut wan hawa blong mekem ol dispel  we bae hemi stap long histri buk blong Solomo aelan. Blong endem naet long taem ia, i bin kat faia wok we hemi bin gohet moa long 30 minit.

 

Long nekis de hemia long Fraeda 30 June, Mr Natuman, hemi bin holem wan kakae blong olgeta memba blong  fos blong Vanuatu oli bin  go serv long Solomon Islands mo olgeta ofisiol blong gavman we oli bin go wetem hem blong farewelem RAMSI. Mr Natuman I talem long olgeta fos memba ia se pipol mo gavman b long Vanuatu oli praod long wok we oli mekem blong ritenem bak lo moodaigo long olgeta pipol blong Solomon Islands.

Designed by PG IT Consulting - webdesign.vu