Wan seremoni i tekem long Sapi eria long Luganville long yestede afternoon we hemi lukim executive blong HOPE PARTI blong foma MP blong Luganville, Kalvau Moli oli kam joenem RMC blong Praem Minista, Charlot Salwai. Seremoni ia i tekem ples widaut Mr Moli.
 
Kastom seremoni ia, oli mekem ikam long National Tresora blong RMC we hemi semtaem Memba blong Palaman Santo,Marco Mahe mo national kodineta blong pati, Emiliano Buletare.
National executive blong HOPE PARTI, oli talem se long las eleksen, oli bin jump long wan ship wetem wan kapten blong new ship ia, be ship ia, hemi stap flot yet wetem ol kru blong hem widaut kapten. Oli talem se naoia, oli nomo save se kapten ia, hemi stap wea. Executive blong HOPE PARTI i talem se afta long las eleksen, oli stap lukautem wan niu ship we hemi kat wan gudfala kapten blong hemi save stiarem wan ship blong oli jump long hem mo bae hemi no ronwe long olgeta. Oli talem se afta long lus blong Mr Moli long las eleksen i bin kat fulap kapten blong ol nara ship we oli go askem olgeta blong oli jump long ship blong olgeta be oli no wandem. Executive blong HOPE PARTI, oli talem se ino kapten blong ship blong RMC we hemi askem olgeta blong oli jump long ship blong hem be olgeta nomo oli tekem desisen ia. Oli talem se oli tekem decision blong joenem RMC from we hemi kat ol gud polisi blong benefitim olgeta wetem ol future pikinini blong olgeta.
Executive blong HOPE PARTI i talem se oli no joenem RMC wetem empti hand be oli joen wetem laef mandeit we hemi 3 kansela blong olgeta insaed long Luganville Municipal kansel mo evri eria komiti blong olgeta. Long las jeneral eleksen, ol eria komiti ia blong HOPE PATI, oli bin manej blong givim ova 600 vote long Mr Moli. Executive blong HOPE PATI i talem se stat yestede mo folem kastom seremoni ia ino nomo kat hop blong kat HOPE PARTI long Luganville.
Mr Mahe mo Buletare tufala i welkam 3 kansela, rejional komiti mo eria komiti blong HOPE PARTI long Luganville ikam long RMC. Tufala i talem se RMC i wan niu politikol parti we hat mo hand blong hem i welkamem evri pipol blong Vanuatu. Mr Buletare i talem se seremoni olsem long yestede long Luganville ino fes seremoni ikam long RMC. Hemi talem se hemi gud blong ol sapota blong ol politikol pati we oli no winim wan MP o kansela long taem blong eleksen, oli fainem wan ples blong olgeta long ol politikol pati we oli stap tede blong benefit long developmen we gavman blong tede, hemi stap karem. Hemi talem se ikat fulap negative tok tok istap kamaut long sosol media olsem Face Book tede be gavman we istap tede, hemi mekem plande developmen we pipol i luk long hae blong olgeta. Mr Buletare i talem se long nekis yia, bae fri akses blong edukesen bae hemi kavremap kinda garden skul mo yia 7 kasem yia 10 mo hemia i wan developmen we bae hemi kavremap evri pipol blong Vanuatu. Naoia fri access polisi ia, hemi kavremap finis yia 1 kasem yia 6.
Mr Mahe i talem se hemi glad blong lukim se wetem 3 kansela we oli joenem RMC long yestede, ikat wan woman kansela mo hemia, hemi risal blong polisi blong RMC long saed blong risev seats. Polisi ia, Praem Minista Charlot Salwai, hemi bin teibelem long palaman taem we hemi bin minista blong intenal afea long taem blong koalisen gavman we deputi praem minista blong tede, Joe Natuman, hemi bin lidim. 
HOPE PARTI, hemi bin karem tugeta ol pipol blong ol difren aelan we oli stap long Luganville mo long taem blong seremoni long yestede, hemi bin lukim oli givim wan red mat, ol kakae wetem mit blong hem ikam national executive blong RMC.
HOPE PARTI, hemi bin  afta we Mr Serge Vohor i bin autem Mr Moli long national executive blong UMP. Long yestede tu Mr Buletare, hemi bin apoentem wan interim komiti blong RMC we hemi karem tugeta ol foma sapota blong HOPE PARTI mo rejional komiti blong RMC long Luganville. Interim komiti ia we presiden blong hem, hemi Mele Ravo. Mr Ravo istap priperem stat long yestede, komiti blong hem blong oli holem wan mini kongres blong RMC blong elektem niu rejional RMC komiti blong Luganville rijen.
Interim vaes president, hemi Jean Yves Etul, interim sekretri jenerol, Hymak William, interim vaes sekretri jeneral, Analine Joseph,interim tresora, Sedrack , interim vaes tresora, Ishmael Lui James, interim RC, Jacob Edwin mo ol memba ikat: Akao Lulu,  Peter Reuben, Wilson Marie, Samuel Restutun, Solomon Paul, Fred Awding, Fabrice Kaenbo mo Nixon Tabimal.

Designed by PG IT Consulting - webdesign.vu