Long sande namba 27 Okis, komuniti blong Mwebalehan blong ol pipol blong Pentecost we oli stap long Port Vila, oli bin kasem blong nambatu taem visit blong minista blong edukesen mo semtaem MP blong Port Vila constituensi, Jean Pierre Nirua blong hemi save handem MP alokesen blong hem igo long presiden blong komuniti, Joseph Molkis. Mani ia bae komuniti, hemi iusim blong helpem buildim wan niu stori building blong komuniti senta blong Mwebalehan long Namburu. Totol mani we Mr Nirua, hemi givim long Mr Molkis, hemi 150 000 vatu. Mr Molkis i talem tankiu long MP blong Port Vila blong hemi save luk save nid blong komuniti. Hemi explenem long minista se niu building ia, bae ikat ol difren rum andanit blong givim igo long tsif mo ol mama blong oli save mekem bisnis blong olgeta long hem. Bae ikat wan rum blong ol oganaesesen i save holem miting insaed. Antap, bae hemi wan kinda garden skul. Mr Molkis, hemi explenem se kinda garden ia, bae ino blong ol pikinini blong Pentecost we bae oli go long hem be bae hemi karem ol pikinini blong ol difren aelan we oli stap long Namburu. Presiden blong Mwebalehan, hemi explenem long Mr Nirua se ting ting blong buildim wan kindi hemi blong ol difren lida blong ol aelan we oli stap long Namburu, oli save titsim ol kastom fasin blong olgeta igo long ol pikinini. Mr Molkis i talem se plande pikinini we oli bon long Port Vila oli no save abaut kastom, kaltsa mo tredisen blong olgeta be hemi no rong blong olgeta be from we yumi no givim wan ples we oli save lanem long hem. Mr Nirua i talem mani ia, hemi smol be hemi glad blong hemi save helpem komuniti long hem. Hemi presem Mwebalehan komuniti long projek blong hem blong hemi save kontribiut long developmen blong edukesen blong ol pikinini long Port Vila. Mr Nirua, hemi tekem janis ia tu blong talem se long nekis yia, bae gavman, hemi givim fri akses blong edukesen ol pikinini blong kinda mo yia 7 kasem yia 10. Fri akses ia, ol pikinini blong yia 1 kasem yia 7, oli benefit long hem finis mo praem minista blong tede, Charlot Salwai, hem nao, hemi bin statem blong implimentem polisi ia taem we hemi bin minista blong edukesen.
Niu building blong Mwebalehan komuniti ia, taem we hemi finis bae hemi wan fes komuniti haus we hemi permanen mo hemi stori building.
Mani blong buildim haus ia, hemi kam nomo long kontribusen blong ol famili blong Mwebalehan mo ol memba nomo, oli buildim. Komuniti, hemi help long evri sarere.

Designed by PG IT Consulting - webdesign.vu