Stat long wiken finis, wok blong evakuetem ol pipol long aelan blong Ambae we oli stap long ol zon o eria we oli stap long hae risk, hemi stat.
NDMO, hemi talem se long luk luk blong olgeta, bae ikat ova long 5 000 pipol we bae oli save muvum olgeta long vilej blong olgeta blong go stap long ol ples we oli seif. Ol ples we i seif istap naoia, hemi long West mo Ist Ambae. NDMO, hemi kamap finis wan MAP blong indiketem ples we pipol ino mas stap long hem mo pleis we i seif blong stap long hem. NDMO mo ofis blong volkeno, tufala i bin infomem Kansel blong ol Minista long tede moning bifo gavman i save tekem wan desisen blong dil wetem situesen blong Ambae. NDMO, hemi statem tok tok finis wetem ol international organisation olsem Red Cross blong olgeta tu, oli save helpem situation. Naoia tu, ikat ol memba blong fos we oli stap long Ambae blong help long saed blong evakuesen. NDMO i talem se afta long evakuesen, bae ikat wanem, oli kolem NO GO ZONE we i minim se pipol ino save go bak long hem. NDMO i talem se bae polis istap blong kontrolem NO GO ZONE ia. Wan delegesen blong olgeta ofisiol mo saetist, oli bin flae igo long Ambae long yestede mo oli talem se talem se klosap evri minit, ikat erapsen. Oli lukim tu evri tri we istap raon long hol blong volkeno, oli ded finis. Oli notisim tu ol toti o das blong volkeno we oli stap long ol lif olsem aelan kabis.
Ripot long Torgil long tede moning, oli talem se ikat ova long 300 pipol blong Saut Ambae we oli stap naoia long ol klasrum mo jioj haus blong olgeta. Ikat pipol tu oli stap long Vureas mo Ambaebulu skul.
Long 2005 finis, Manaro, hemi bin kirap mo oli bin evakuetem ol pipol long ol riski eria. 

Designed by PG IT Consulting - webdesign.vu