Praem Minista Charlot Salwai i talem se Council blong ol Minista, COM, hemi disaed long miting blong hem long tede, 28 Septemba blong aplaem COMPOLSORY EVACUATION blong ova 11 000 pipol. Mr Salwai i talem se gavman i disaed blong mekem kompolsori evakuesen ia blong soem se gavman ikat konsen long laif blong ol pipol. Praem Minista i talem se laif blong pipol hemi moa impoten long materiol ting. Mr Salwai i talem se hemi save se bae pipol blong Ambae bae oli no wandem lego aelan blong olgeta, ples we oli bon long hem wetem ol karen mo haus blong olgeta be oli mas ting ting hevi long laif blong olgeta. Hemi talem se pipol i save mekem karen bagegen be pipol ino save mekem man o woman i laif bagegen. Praem Minista i talem se gavman i sendem finis ol polis ofisa blong sekurim ol properti blong pipol blong Ambae taem we oli no stap. Long desisen blong COM long mande, COM i disaed tu blong apil long olgeta komuniti lida olsem ol tsif, ol jioj lida mo ol woman lida blong oli tok tok long ol pipol blong olgeta blong respektem ol properti blong ol nara pipol. 

Long miting blong COM long tede, ol minista oli agri tu se kompolsori evakuesen ia, bae hemi gohet kasem long 6 Oktoba. Hemia hemi minim se afta long deit ia, yumi ekspektem se bae inomo kat wan man istap long aelan blong Ambae. Gavman i kasem ripot tu se sam pipol, oli bin mu festaem finis mo askem NDMO blong folemap mo fainem wea ples nao, oli stap long hem mo rikodem olgeta.
COM hemi aedentifaem Loltong mo Lonorore olsem ol ples we pipol i save stat muv igo long hem blong wet long ol nara aelan sapos we bae oli wandem blong risivim ol pipol blong Ambae. Mr Salwai i talem se bifo oli go long ol nara aelan, Penama provins, hemi mas soem spirit blong komuniti mo famili blong risivom olgeta pipol.
Ripot long tede long Ambae, oli talem se pipol istap gohet yet blong lego aelan ia.
 

Designed by PG IT Consulting - webdesign.vu