Foma presiden blong Malvatumauri National Kansel blong ol tsif mo hae tsif blong Not Pentecost, tsif Paul Tahi, hemi talem se bae hemi wan sad moment blong pipol blong hem oli lego bagegen ol pipol blong Ambae igo bak long hom blong olgeta. Tsif Tahi i talem se ol famili blong Ambae we oli bin go long Pentecost, oli bin folem laen blong olgeta. Hemi talem se hemi bae-mistek we ol famili ia oli go long Pentecost. Tsif Tahi i talem se stret nomo blong oli resis igo long mama blong olgeta taem we oli stap long problem. Long kastom storian blong Pentecost, Ambae mo Maewo, aelan blong Maewo, hemi papa, Pentecost, hemi mama mo Ambae, hemi pikinini. Tsif Tahi i talem se long sot taem we ol pikinini istap wetem mama blong olgeta, oli bin lanem mo serem  plande samting mo bae hemi no isi blong lego olgeta. Hemi talem se bae oli no wandem lukim olgeta i lego mama blong olgeta. Hemi talem se sapos situesen, hemi bin go nogud, mama i redi blong givim speis long pikinini blong hem. Tsif Tahi, hemi talem tankiu long gavman long asistens we hemi bin givim long ol famili blong Not Pentecost blong oli save lukautem ol famili blong Ambae.
 

Designed by PG IT Consulting - webdesign.vu