Praem Minista, hemi perfomem kastom seremoni igo long chief blong Efate long namba 1 oktoba blong talem tankiu long olgeta blong oli save givim graon blong olgeta blong Bauerfield International Airport i save stap long hem.
Mr Salwai i talem se fasin blong pipol blong Efate, oli save givim graon ia, bae hemi mekem se Vanuatu, hemi save kat bigfala airport we hemi save karem ol darek flaet ikam long Europ mo Asia. 
Mr Salwai i talem se tede gavman i nidim lan blong mekem developmen long hem. Hemi talem maet long taem we istap kam, bae i save kat developmen long skae o long solwota be tede, hemi graon. Praem minista Salwai i talem se kastom seremoni we gavman i mekem igo long olgeta pipol blong Efate spesiali olgeta we oli lan ona, hemi smol komperem long valiu blong graon we airport, hemi stap long hem.
Chief Poilapa blong Mele village, hemi talem tankiu long gavman blong hemi save perfomem kastom seremoni.
Project blong apgradem Bauerfield International Airport, hemi wan fes praeriti we taem we Mr Salwai, hemi kam praem minista, hemi wandem, hemi hapen hariap blong ol plen oli save lan long hem bagegen from problem blong runway be wetem ol proses blong wok blong bank mo ol lo blong Vanuatu, hemi bin dileiem. Mr Salwai talem se plande long olgeta, hemi ol isiu blong lo blong Vanuatu wetem ol dipatmen blong gavman. Hemi askem ol dipatmen ia blong wok tugeta mo solvem problem sapos ikat. Mr Salwai talem se kampani blong buildim airport, hemi bin redi be wok hemi slo folem dilei from proses blong wok folem lo blong Vanuatu. Wan long olgeta problem, hemi wota proteksen zon blong Port Vila we hemi lukim kampani blong China, hemi no save mixim kolta blong hem klosap long airport be hemi mas go mekem long wan eria klosap long Samasama. Kampani, bae hemi putum about wan yia blong hemi save finisim wok blong runway long airport ia.

Designed by PG IT Consulting - webdesign.vu