National Executif blong RMC I talem se ol memba blong palaman blong RMC ino involve long ol allegations blong motion blong no gat trust agensem Praem Minista Charlot Salwai. Ikat allegations se opposition istap planem naoia mo hemi stap ronron olbaut blong lukautem sapot long ol MP blong gavman saed.

National executif blong RMC I wandem kliarem se ino kat wan MP blong hem igo tok tok wetem opposition olsem we ol tok tok long rod istap talem long wik ia mo hemi konfomem se oli stap wan istap.

National executif blong RMC I wandem talemaut se opposition nao, hemi stap kontaktem ol MP blong hem mo ofarem ol ministerial portfolio long olgeta be ino olgeta igo dimandem long opposition olsem we opposition istap kleim.

National Executif blong RMC I wandem talem se opposition nao, hemi stap ring long ol MP blong RMC mo opposition iven go luk ol family blong olgeta blong konvinsim ol MP blong RMC blong go saenem motion of no confidence agensem Praem Minista Salwai.

 National executif  blong RMC hemi assurem ol nara politikol parti we oli stap long gavman, ol sapota blong RMC mo pablik se ol MP blong hem, oli wan mo oli solid istap.

National executif blong RMC I talem se kantri hemi steibol istap wan yia finis mo risal blong hem nao, hemi lukim plande develomen, hemi stap kirap tede.

National executif blong RMC, hemi wandem talem tankiu long ol nara politikol parti we oli stap long gavman stat we hemi bon long last yia mo kam kasem long tede, oli strong istap agensem ol ofa we opposition, hemi stap oferem long olgeta.

National executif blong RMC, hemi apil long opposition blong hemi stop kiaman long nem blong ol MP blong RMC.

National executif blong RMC I talem se hemia ino festaem we opposition, hemi iusim nem blong ol MP we oli stap long gavman saed.

Designed by PG IT Consulting - webdesign.vu