Praem Minista Charlot Salwai i talem se noni ikam tede wan nara prodak we pipol blong Vanuatu i save kasem mani long hem.
 Mr Salwai i mekem toktok ia taem we hemi visitim karen blong noni long namba 4 februari long Velit Bay long Ist Santo. Folem ol infomesen we praem minista, minista blong agrikaltsa, Matai Seremaia, minista blong fainens mo semtaem MP blong Santo, Gaetan Pikioune mo ol sinia ofisiol blong gavman we oli stap long aelan blong Santo, man i save stat blong winim mani long hem afta long wan yia nomo komperem long kava mo kokonas we hemi putum 5 tu 6 yia blong ol fama, oli save winim vatu long hem. Ol infomesen abaut noni ia se long wan stamba nomo, man i save winim 6 000 vatu mo long wan hekta nomo, man i save planem 1 000 stamba. Ol ripot we Vanuatu Gavman Website, hemi kasem i talem se man i save havestem noni 4 taem long wan yia. Infomesen we praem minista mo delegesen blong hem, oli kasem long kampani blong China we hemi planem noni ia se hemi kat maket blong hem long China. Kampani ia, hemi stap buildim naoia wan bigfala haus long Velit Bay  we bae hemi kam olsem faktri blong prosesem noni ia.  Kampani i talem tu se bae hemi givim fri ol smosmol tri noni igo long olgeta pipol we oli kat intres blong planem mo afta we bae hemi karem frut, ol pipol o komuniti i save salem bak long faktri.
Mr Salwai i talem se taem we yu komperem noni long kava, kava ino kat maket mo faktri blong hem be noni, hemi kat faktri blong hem long Vanuatu mo maket blong china. Populesen blong China long tede, hemi ova long wan bilien pipol mo sapos, noni, hemi kat maket long China, hemi wan gudfala bisnis blong olgeta pipol blong Vanuatu.
Praem Minista Salwai i talem se hem wan yet, hemi lukim noni blong Vanuatu we oli stat salem finis long China mo hemia hemi soem se ol sinua, oli laikem noni. Noni we oli salem naoia long China, wan nara kampani we hemi stap long Efate hem nao istap sendem igo.
Hemi apil long ol wokman blong gavman we oli beis istap long Santo blong oli helpem ol investa we oli wandem invest long Vanuatu. Praem minista i talem se gavman i promotem bigwan Vanuatu se hemi wan gudfala ples blong investmen be sapos ol investa ia oli kam mo yumi helpem olgeta bae oli go bak wetem mani blong olgeta. Bae ol investa ia, oli save diskarejem ol nara investa blong oli no kam long Vanuatu. Hemi talem se plande taem, ol investa we oli kam, oli no save abaut proses blong oli save invest long Vanuatu mo hemi apil long ol wokman blong gavman blong oli helpem ol investa ia.
Mr Salwai i apil long ol komuniti raon long Velit Bay blong oli lukautem gud plantesen blong noni ia. Apil ia, hemi folem ol toktok se sam pipol, oli  bin brekem fanis blong plantesen blong noni mo oli go rutumaut sam stamba blong noni. Mr Salwai i apil long olgeta tsif mo pipol raon long Velit Bay blong oli no distebem developmen blong noni be oli mas help blong protektem. Hemi talem se ol pipol we bae oli benefit festaem long projek ia, hemi olgeta we oli stap raon long eria ia.

Designed by PG IT Consulting - webdesign.vu