Praem Minista Charlot Salwai, hemi handem ova long tede, monday namba 5 March 2018, wan bus igo long Malfatumauri National Kansel blong ol chief. Mr Salwai i talem se help blong gavman ia, hemi folem rikues blong presiden blong Malfatumauri igo long fleet committee we hemi stap long pablik sevis commission. Pablik sevis commission, hemi stap anda long ofis blong praem minista.
Hemi kongratuletem presiden blong national kansel blong ol chief long kontribusen blong olgeta blong holem taet pis mo uniti blong pipol blong Vanuatu. Mr Salwai i talem se tede ol kastom chief oli kontribiut bigwan long wok blong mantenem lo mo oda. Hemi talem se long sam eria we gavman ino save mekem wok long hem, ol chief oli stap blong mekem wok.
Presiden blong Malfatumauri, chief Tirsupe i talem tankiu long gavman from donation ia. Hemi talem se hem nao i bin askem bus ia long gavman folem nid we ofis blong hem, hemi kat. Hemi talem se kasem tede, hem wetem ol staf blong hem, oli yusim wan trak nomo. Chief i talem se bus, hemi blong ol staf oli iusim long saed blong administration. Hemi talem se bus ia, bae hemi helpem bigwan ol staf long administresen blong oli save mekem gud wok blong olgeta. Bae hemi help bigwan tu blong stap karem ol chief we oli memba blong Malfatumauri long taem blong bigfala miting blong olgeta. Long sem de ia, presiden blong Malfatumauri, hemi givim kastom tamtam blong aelan blong Embrym igo long Praem Minista Salwai blong talem se oli hapi bigwan long bus ia.
Bus ia, hemi wan long olgeta we gavman blong China, hemi bin handem ova ikam long gavman blong Vanuatu blong oli iusim long taem blong las saut pacific mini gem long Port Vila. Handing ova we Mr Salwai hemi mekem long tede, hemi blong makem national de blong ol chief raon long kantri. National de blong ol kastom chief blong Vanuatu long Port Vila, hemi lukim President blong Ripablik blong Vanuatu, Pastor Obed Moses Tallis, memba blong palaman blong Port Vila, Ralph Regenvanu, tufala tu i bin joenem selebresen.  De ia, hemi lukim ol pipol we oli go long selebresen, oli kakae lokol kakae we pipol blong Mangaliliu long not Efate, oli bin priperem. Ikat tu ol tanis kastom we i kamaut long ol difren komuiniti blong Port Vila mo ol studen blong Lycee Louis Antoine de Boungainville.
 

 

Designed by PG IT Consulting - webdesign.vu