Folem problem we volkeno blong Ambae istap kosem wetem asis blong hem, bae long mande nekis wik 23 April, bae ol chief blong Pentecost mo Maewo bae oli kat wan miting blong olgeta long hed kota blong Penama provins blong luk luk long desisen we Kansel Blong ol Minista, hemi tekem long las wik.
KBM blong ol minista, hemi bin disaed long miting blong hem blong gavman, hemi tok tok wetem ol chief blong Pentecost mo Maewo blong sapos, tufala aelan ia i save givim wan pis graon blong muvum ol pipol blong Ambae igo long hem. Pis graon ia, bae hemi no blong risivim ol pipol blong Ambae long sot taem nomo be bae hemi olsem niu hom blong olgeta. Graon ia bae gavman, hemi pem blong olgeta. Ting ting bihaen blong tsusum tufala aelan ia, hemi blong kipim spirit blong famili mo provins istap mo hemi klosap tu long aelan blong Ambae. Hemia bae hemi mekem se sapos, pipol blong Ambae hemi muv igo be hemi klosap blong oli save go mo kam bak taem we situesen, hemi kam gud. Desisen blong KBM ia, hemi blong gavman, hemi pem wan permanent graon blong pipol blong Ambae. Gvaman website, hemi kasem infomesen se ikat ol nara aelan tu we oli redi blong givim graon long ol pipol blong Ambae.
Long taem blong fes evacuation ol chief blong Pentecost mo Maewo, oli bin talem finis long gavman se oli redi blong givim graon blong pipol blong Ambae oli save go stap long hem. Ol hae chief blong Maewo, oli talem long gavman se Maewo hem wan, hemi save akomodetem evri pipol blong Ambae. Long taem blong fes evacuation ikat wan total blong ova 11 000 pipol we gavman i bin muvum olgeta igo stap long Santo, Maewo, Pentecost mo Efate.
Naoia ikat wan total blong 9 000 pipol blong aelan ia we oli stap olbaut long ol evacuation senta long Ist Ambae. Long taem blong fes desisen blong KBM, i bin kat dikleresen nomo blong Saut mo West ikam wan disasta zon be long ol de we i pas wetem jenis blong dareksen blong win hemi mekem se asis i fuldaon tu long noten part blong Ambae. Ol ofisiol blong gavman we oli bin stap long aelan ia long wik ia, oli talem se dameij we asis blong vokeno, hemi mekem long Ambae, hemi bitim saeklon kategori 5.

Designed by PG IT Consulting - webdesign.vu