China i fes kantri autsaed long Vanuatu blong harem krae blong pipol blong Ambae folem problem we asis blong volkeno i mekem long aelan.
Tede aftenun, ambasada blong China long Vanuatu hemi handem ova wan check blong 10 milien vatu igo long akting praem minista, Jean Pierre Nirua.
Ambasada blong China i talem se gavman mo pipol blong People's Republic of China, oli hapi bigwan blong oli save oferem humaniterian assistens igo long olgeta pipol blong Ambae. Hemi talem se heart blong pipol blong China, hemi stap wetem ol pipol blong Ambae long situation we oli stap fesem naoia.
Hemi talem se China, hemi wandem help blong karemaut pipol blong Ambae long hat taem we oli stap fesem naoia. Ambasada blong China, hemi talem se hemi hapi long wok we gavman blong Vanuatu, hemi bin mekem long taem blong fes evacuation blong ol pipol blong Ambae long taem blong erruption blong volkeno.
Hemi talem se help ia, hemi folem tu gudfala rilesensip we Vanuatu hemi kat wetem China.
Mr Nirua i talem tankiu long gavman blong China mo apil long ol nara kantri blong mekem semak olsem China. Akting praem minista i talem se cash mani we ikam long gavman blong China, hemi go inlaen wetem tradisen mo kastom blong Vanuatu we hemi blong helpem pipol taem we oli nidim help.
 

Designed by PG IT Consulting - webdesign.vu