Ofis blong praem minista i glad blong talem se anda long gavman blong tede, ol Ni-Vanuatu pilot oli stat blong intarem bak Air Vanuatu. Ikat plande Ni-Vanuatu pilot we oli finisim stadi mo oli stap kam folem rod nomo long Port Vila while kampani istap karem ol expatriet blong oli kam flaem ol plen blong Air Vanuatu. Plande ol expatriet pilot ia, oli kam blong mekem hawa blong olgeta nomo mo taem we oli mekem inaf hawa, oli go bak long kantri blong olgeta. Fasin blong Air Vanuatu istap karem ol expatriet blong kam flaem plen blong Vanuatu, hemi mekem ol Ni-Vanuatu pilot ino save flae, Sam long olgeta oli iven go long nara kantri blong flaem plen blong olgeta. Ikat ripot se sam oli stap kambak finis long Vanuatu. Ofis blong praem minista, hemi sapraes blong harem bloc blong Sato Kilman mo Ishmael Kalsakau i agensem ol lokol pilot be hemi no tokbaut ol expatriet pilot long press confrens blong tufala long yesterday. Ofis blong praem minista i sakemaut toktok blong press konfrens blong Kilman mo Kalsakau yestede se praem minista i fosem Air Vanuatu Board blong karem bak wan pilot we hemi bin failem exam blong hem. Ofis blong praem minista i talem se evri Ni-Vanuatu pilot we oli flaem plen tede oli winim pepa blong olgeta mo oposisen, hemi shut praod long hem.Ofis blong praem minista, hemi aware se ol Ni-Vanuatu pilot, oli kat moa hawa bitim ol expatriet pilot we oli kam mekem hawa blong olgeta.Ofis blong praem minista i talem se gavman, hemi spendem bigfala mani blong pem stadi blong ol lokol pilot ia mo hemi no gud taem we oli finisim stadi be oli no save wok.
 

Designed by PG IT Consulting - webdesign.vu