Wan bigman blong Agence de Developpement Francaise, hemi stap long wik ia long Port Vila. Delegesen blong AFD ia, bae hemi mit wetem ol big big man blong gavman olsem Praem Minista, Charlot Salwai.
Long tusde namba 5 Jun 2018, ambasada blong Franis long Vanuatu, hemi oganaesem wan kakae long tina long haus blong hem long Tasiriki we hemi karem tugeta ADF mo Mr Salwai blong oli save rivisitim ol developmen we AFD, hemi bin mekem long ol yia we i pas mo wanem nao niu developmen we gavman blong Vanuatu i wandem se AFD i save helpem hem long hem.
AFD delegesen i iven proposem blong long Praem Minista blong hemi go long hed kota blong olgeta long Franis mo proposem ol list blong ol projek we gavman i wandem help blong oganaesen ia long hem o raitem leta blong rikues igo long olgeta.
Ol last projek we AFD, hemi helpem Vanuatu long hem, hemi kolta airport blong Lonorore long Pentecost mo Longana long Ambae. Sem projek ia, hemi sapos blong hapen tu long Norsup airport long Malekula mo long Not Embrym be ino save tekem ples folem disput blong graon.

Designed by PG IT Consulting - webdesign.vu