Folem nius we i kamaut long Radio Vanuatu long yesterday se pipol blong Saut Santo oli wari from kolta rod blong olgeta, ofis blong praem minista i wandem asurem ol chief mo pipol blong Saut Santo se bae oli kat kolta rod blong olgeta. Ofis blong praem minista i wandem talem se projek blong kolta rod blong Saut Santo ino wan politikol projek be hemi gavman projek. Long yia Praem Minista Charlot Salwai mo minista blong finance, Gaetan Pikioune, tufala i bin go mitim ol chief mo pipol blong Saut Santo blong talem se long olgeta se gavman bae hemi mekem kolta rod blong olgeta. Ofis blong praem minista i wandem mekem save long ol pipol blong Saut Santo se termination blong Jotham Napat olsem minista blong pablik utiliti ino afektem nating kolta rod blong Saut Santo. Mr Napat i finis olsem minista be kolta rod blong Saut Santo. bae hemi still gohet. World Bank nao, bae hemi givim mani blong kolta rod blong Saut Santo mo ol proses blong hem istap gohet. Mr Salwai mo Mr Pikioune tufala i talem long ol chief mo pipol blong Saut Santo long Natjingo Point se Saut Santo hemi wan long olgeta eria blong Vanuatu we hemi kat potential blong developem ekonomi blong Vanuatu. Tufala i talem se nomata we rod blong olgeta, hemi stap long rabis kondisen be Saut Santo hemi kontribiut bigwan long ekonomik developmen blong Vanuatu.

Designed by PG IT Consulting - webdesign.vu