150 000 noni tri istap finis long graon blong Velit Bay long Ist Santo. Hemia i infomesen we managment i talem long praem minista Charlot Salwai taem we hemi visitim plantesen long las wiken. 
 
Long semtaem tu, Mr Salwai hemi notisim se naoia harvest blong ol noni fruit hemi stat finis blong mekem noni juice long hem, tablet o capsule mo 2 nara prodak bagegen aut long noni fruit.
Praem minista Salwai, hemi bin kat janis tu blong visitim faktri blong noni we istap long Velit Bay.
 
Faktri we istap naoia long Velit Bay, hemi kat bigfala kapasiti blong hemi krasem noni frut long wan de mo hemia we istap long plantesen naoia long Velit Bay, hemi smol. From hemia managment Waike Group, wan kampani blong China, hemi stap manejem plantesen hemi serem ol fri sedling igo long fama blong Santo. Managment blong kampani ia i talem se fri sedling ia, kampani hemi redi blong givim fri igo long ol fama long ol nara aelan tu blong oli save planem mo salem long olgeta afta. 
Oli talem se bae oli setemap ol senta blong olgeta long ol aelan blong pem ol noni ia mo bae oli pem wan ship we hemi blong transportem ol noni fruit nomo igo long faktri long Santo.
Naoia long neseri blong olgeta, ikat 60 000 smosmol noni tri istap long hem. Taem we oli redi, bae oli saplaem fri igo long ol fama we oli kat intres blong planem.
Naoia we istap praes blong noni, hemi moa gud yet long praes blong kopra.  Naoia we istap tu, noni ino olsem kava mo koprah. Tufala prodak ia we pipol blong Vanuatu i planem, hemi kat maket be ino faktri blong hem long Vanuatu. Noni hemi kat maket wetem ova long wan bilien populesen blong China mo naoia hemi kat faktri long Santo long Velit Bay mo narawan long Rentapao long Efate. Noni tri, hemi gru long any graon o evri ples long Vanuatu mo hemi save karem fruit afta long wan yia 3 manis nomo. Insaed long wan hekta, wan fama i save planem 1 000 stamba.
Kampani ia, hemi kat intres tu blong pem ol fruit blong nambagura.
Kampani, hemi ripotem tu se ikat sam pipol oli bin go long plantesen blong olgeta long las yia mo damejem 1 200 stamba blong noni. Damage ia istap long hand blong polis finis.

Designed by PG IT Consulting - webdesign.vu