Praem Minista Charlot Salwai i talem tankiu long Secretariat blong Saut Pacific Forum long role mo plan blong hem blong fainensem climate change ol memba kantri.
Toktok tankiu ia, Mr Salwai i talem long Secretary General blong Forum, Meg Taylor taem we hemi mitim hem long tede morning, mande 4 February long PM office.
Meg Taylor i talem se Secretariat hemi wok hat blong kasem mani blong hemi save helpem ol memba kantri taem we wan disasta i kasem olgeta.
Meg Taylor i talem se hemi gud blong ol dona kantri oli helpem ol Forum memba kantri long taem blong disasta be hemi gud tu Forum tu hemi save help.
SG blong Forum i talem se bae hemi sendem wan tim blong forum ikam long Vanuatu long ting ting ia blong Forum i fainem mani blong helpem ol memba kantri  long saed blong ol challenge blong climate change.\
Meg Taylor i talem long Mr Salwai se theme o bigfala toktok blong Fotum miting long Tuvalu long yia ia, hemi " Securing Future in the Pacific".
PM Salwai i talem se Vanuatu bae hemi welkamem ol lida blong nekis yia, taem we bae hostem nekis miting blong Forum. PM Salwai i talem se hosting blong forum summit long nekis yia, bae hemi go wetem selebresen blong 40 indipendens aniverseri blong Vanuatu.

Designed by PG IT Consulting - webdesign.vu