Ol chief blong sentrol Pentecost mo Praem minista Charlot Salwai oli welkamem decision blong Appeal Court regardem issue blong appointment blong parliamentary secretary long yesterday. Tede morning oli chief mitim Mr Salwai blong kongratuletem hem long development we i kirap long Pentecost mo ol aelan blong Vanuatu. Ol chief i talem se sapos lida blong opposition i wandem MP blong olgeta i risaen olsem Praem Minista blong Vanuatu, hem fes i mas risaen olsem lida blong opposition afta we hemi lusum 7 motion of no confidence agensem MP blong olgeta. Oli talem se hemia i wan decision nomo blong court long level blong judiciary be Mr Kalsakau i lusum 7 motion long level blong legislative. Oli askem Mr Kalsakau blong hemi no politisaesem decision blong Appeal Court be hemi stap priperem hem blong winin bak tsea blong hem long 2020 general election. Ol chief i talem se olgeta i redy blong putum bak MP blong olgeta long nekis palaman long 2020 general election. Oli talem se i gud blong Mr Kalsakau i karemaut toti long eye blong hem bifo i askem MP blong olgeta blong hemi risaen. Yesterday naet ikat bigfala tanis kastom "sawagoro" long nakamal blong Lebati blong welkamem decision blong Appeal Court. 
Praem Minista Salwai istap naoia long Melsisi blong selebretem 39th Independence anniversary wetem ol pipol blong hem bifo hemi kambak long Port Vila long mande.

Designed by PG IT Consulting - webdesign.vu